– मारेगाव तालुका काँग्रेस कमिटीचा पुढाकार
– न्याय मिळेपर्यंत उपोषणाची ज्योत तेवत राहणार
लोकशस्त्र न्युज नेटवर्क : मारेगाव
मारेगाव तालुक्यातील एमएसईबी उपविभागाकडून सुरू असलेले विजेचे लोडशेडिंग बंद करून शेतकऱ्यांसह तालुक्यातील जनतेला न्याय मिळावा याकरिता काँग्रेसचे माजी आमदार वामन कासावार तथा काँग्रेसचे जेष्ठ नेते नरेंद्र पाटील ठाकरे यांच्या मार्गदर्शनात मारेगाव तालुका काँग्रेस कमिटीच्या वतीने स्थानिक पोलीस वेलफेअर भारत पेट्रोल पंपा समोर मार्डी चौकात २३ ऑगस्ट रोजी आमरण उपोषणाचे हत्यार उपसले आहे.
तालुका काँग्रेस कमिटीच्या वतीने सुरू करण्यात आलेल्या या आमरण उपोषणास तालुका काँग्रेस कमिटीचे अध्यक्ष मारोती गौरकार, कृषी उत्पन्न बाजार समिती सभापती तथा जनहित कल्याण संघटनेचे संस्थापक अध्यक्ष गौरीशंकर खुराणा, तालुका युवक काँग्रेस अध्यक्ष तथा नगरसेवक आकाश बदकी तसेच काँग्रेस कार्यकर्ते अंकुश माफुर अशी आमरण उपोषणास बसलेल्या उपोषण कर्त्यांची नावे आहेत.
दरम्यान गत काही दिवसापासून तालुक्यात विजेचा लपंडाव सुरू आहे. विद्युत पुरवठा खंडित होण्याचे निश्चित असे वेळापत्रक नाही. त्यामुळे शेती पिकांना पाण्याची नितांत गरज असताना महावितरण कडुन मनमानी कारभार सुरू आहे. यात बळीराजाचे प्रचंड नुकसान होत आहे.
या विरोधात तालुका काँग्रेस कमिटीकडुन तीन दिवसांच्या अल्टिमेटमसह निवेदन सादर करण्यात आले होते. परंतु महावितरण कडून अद्याप निवेदनाची दखल घेतली गेली नाही. परिणामी ता.२३ ऑक्टोबर रोजी तालुका काँग्रेस कमिटीने स्थानिक पोलीस वेल्फेअर भारत पेट्रोलियम पंपा समोर मार्डी चौकात आमरण उपोषणाचे हत्यार उपसले आहे.
सदर आमरण उपोषणात वीज वितरण उपविभागास शेतकरी हिताच्या विजेसंबंधीच्या अनेक मागण्या करण्यात आल्या आहेत. तूर्तास महावितरण कडून सदर मागण्या मान्य होत नाही तोपर्यंत आमरण उपोषण सुरू राहणार आहे.
