लोकशस्त्र न्युज नेटवर्क/ मारेगाव……
राज्य मार्गावरील बोटोणी पासून हाकेच्या अंतरावर असलेल्या घोगूलदरा फाट्यानजीक वणीकडून येणाऱ्या अज्ञात कार च्या धडकेत दुचाकी वरील दोन इसम गंभीर जखमी झाल्याची घटना ता. २९ मार्च ला सायंकाळी सात वाजेदरम्यान घडली असून दोघांनाही जखमी अवस्थेत करंजी येथील रुग्णालयात दाखल करण्यात आल्याची माहीती आहे.
सतीश झिंगू आत्राम (२१) वाघदरा व निलेश तुकाराम टेकाम (३५) वाघदरा हे दोघेही दुचाकीने ता.२९ मार्च रोजी सायंकाळी सात वाजेदरम्यान घोगूलदरा येथून वाघदराला परतीच्या प्रवासात असताना राज्य महामार्गावरील बोटोणी पासून अगदी हाकेच्या अंतरावर असलेल्या घोगूलदरा फाट्यानजीक, वणीकडून येणाऱ्या अज्ञात कारने जबर धडक दिल्याने दुचाकी वरील दोघेही गंभीर जखमी झाल्याची माहिती आहे. कारने तरुणांना अक्षरशः फरफटत नेले. तर दुचाकीला अंदाजे अर्धा किमी अंतरापर्यंत फरफटत आणले. जवळच असलेल्या गतिरोधका जवळ दुचाकी कार मधून निघाली.मात्र कार चालक पळून जाण्यात यशस्वी झाल्याची सुध्दा माहीती आहे.
सतीश आत्राम, व निलेश टेकाम रा.दोघेही वाघदरा त्यांची प्रकृती चिंताजनक असून दोन्हीही जखमींना प्राथमिक आरोग्य केंद्र करंजी येथे प्राथमिक उपचार करुन प्रकृती गंभीर असल्याने पुढील उपचाराठी हलविण्यात आल्याची माहीती आहे.
